CAB sawihonaa eptu MP ṭhenkhat thusawi
Rajya Sabha-a CAB debate neihnaah hian eptu party hrang hrangte an ding a ni. Congress MP Anand Sharma chuan bul ṭanin, India ramah hian refugee te hnena khua leh tui nihna pekna turah sakhua chu tehfungah hman a la ni ngai lo, a ti. Eng party constitution mah India ram Constitution chungah emaw, a kalh emawin a awm tur a ni lo, tiin a sawi. He bill hian India thinlung a ti na takzet a ni tiin Sharma chuan a sawi.
Congress MP leh finance minister hlui P Chidambaram chuan sorkar chuan arbitrary law hmangin he citizenship bill hi a pharh a ni tiin nghawng pawi tak a neih tur thu a sawi a, Constitution chu a chhung lam aṭangin tihchhiatin a awm mek a ni, a ti. Engvangin nge sakhaw thila tihduhdah tuarte chauh huam tir a, politics leh hnam thil vanga tihduhdah tawkte huam tel an nih loh chhante a zawt. Chidambaram chuan bill hi pass a nih pawhin Congress chuan Surpeme Court-ah a kalpui dawn tih sawiin, dan thiamte endikna chu a paltlang zo dawn chuang lo tih a sawi. Mipuite thlan ni lo judge-te chuan mipuiten an aiawh tura an thlante thiltih dan chu ram danpui kalh a nih leh nih loh an lo rel tawh dawn a, hei hi Parliament tan pawha thil zahthlak tak tur a ni, a ti.
Samajwadi Party MP, Javed Ali Khan chuan sakhaw pakhat lalna ramah chuan sakhaw tlem zawkte chungah dik taka rorelsak an ni ngai lo tih sawiin, hetiang hi India rama a thlen ve an duh lo tih a sawi. Politician ṭhenkhatin India chu Muslim awm lohna rama siam an tum thute pawh an sawi ṭhin thu sawiin, NRC leh CAB chu Muslim awm lohna India ram siam tum tihputlinna tur a ni, a ti.
Trinamool Congress MP Derek O'Brien chuan India ram chu democracy aṭangin dictatorship-ah a inlet ṭan mek tih sawiin, CAB vang hian peope movement pawh a awm ngei dawn a ni, a ti. CAB chu Nazi copybook
aṭanga siam a ni, a ti bawk. BJP sorkar chu thutiam kawngah a ṭha hle a, chu aimah chuan thutiam bawhchhiat kawngah a la ṭha zawk cheu a ni, a ti. MDMK leader Vaiko chuan he bill ngeiawm tak, democracy kalh, awmze nei lo, ngaihdam theih loh, hrilhfiah theih loh leh ram danpui kalh hi pass a nih chuan, Upper House-a thil thlenga hun thim ber a ni ang tiin a sawi bawk.