Chennai-a MGR Memorial bulah Jaya-i phum

Tamil Nadu Chief Minister J Jayalalithaa-i chu Thawhṭanni zan dar 11.30 khan kum 68 mi niin a thi a, Thawhlehni khan state chawimawina famkim nen vui a ni a, a ruang hi hal loin Chennai-a Marina Beach-a MGR Memorial bulah zalh a ni.

Kum sawmthum chuang Tamil Nadu politics-a mi langsar, AIADMK hotu Jaya-i hi a ngaisangtu leh amah zuitute chuan ëAmmaí (mother) tiin an sawi ṭhin a, a vuina inkhawmah hian mi nuai tel an tel a ni.

Jaya-i vuina inkhawmah hian President Pranab Mukherjee, Prime Minister Narendra Modi, Congress vice president Rahul Gandhi, Union Minister Venkaiah Naidu, Tamil Nadu Chief Minister thar O Panneerselvam bakah, state dang chief minister pasarih an tel.

Rajaji Hall-a vuina inkhawm chu tlai dar 4:30 ah ṭanin, zan dar 6 ah zawh a ni a, hemi hnu hian a ruang chu venhimna khauh tak hnuaiah Marina Beach lam panpui a ni. Kawng lakah amah ngaisangtu tam takin lo thlahin, pangparte an lo theh a ni. Politics lama amah siam liantu, film a lo chanpui ṭhin leh Tamil Nadu chief minister hlui MG Ramachanran thlan bulah phum a ni ta a ni.

Jayalalithaa-i hi Hindu sakhaw zuitu a ni a, mahse a ruang hi an sakhaw tihdan phunga halral loin phum ani thung. Phum a nih chhan hi sawi a tam hle a, amah ngei pawhin a thih hunah a ruang hi hal loa phum a duh thu te a lo sawi tawh nia sawi a ni bawk. Hei bakah hian amah siam liantu, MGR chu phum anih avangin phum a nih ve ta nia sawi pawh a awm bawk.

Ṭhenkhat chuan Jaya-i hian a vahnu, Deepa Jayakumar tih loh chu thisen zawmpui dang a nei lo a, a vahnu nen hian an inpawh ṭha lo hle a, hei vang hian a ruang hi hal a nih chuan mei dep kaitu tur midang an awm lo nia sawi a ni. Apollo Hospital-a hun rei tak enkawl a nih chhung pawh khan a nuṭa neih≠chhun thi tawh Jayakumar-a fanu, Deepa hian vawi tam tak hmuh a tum ṭhin a, mahse a hmuh phalsak a ni ngai lo a, a chhan erawh tarlan a ni lo.