Palaite sum indaih loh vangin Russia a lungawi lo

Russia chuan sorkar laipuiin pawisa note sang pahnih, Rs 500 leh Rs 1,000 note a tih thih avanga ramchhunga pawisa note indaih lohna thleng mek chuan India rama a palaite pawh a nghawng tih sawiin, a lungawi loh thu a sawi.

Russian ambassador Alaxander Kadakin chuan ramdang palaite chuan an mamawh ang sum an la chhuak thei lo a, hei hian an hnathawh thlengin a tibahlah tih sawiin, External Affairs Ministry hnenah ramdang mi hnathawka awmte sum lakchhuah theih zat bihthliah sak chu sut a nih theih nan inrawlh turin a ngen.

Kadakin chuan MEA chhanna hi an nghak mek tih sawiin, an buaina chu chinfel sak an nih thuai a beisei tih a sawi. An ngenna hi ngaihtuah sak a nih loh chuan kawng dang an dap a ngai dawn a, Russia-a Indian embassy-a Indian Minister Counsellor koin an sawipui a ngai mai dawn niin a sawi.

UK-a MP, Indian-origin Virenda Sharma pawhin sorkar laipui hnenah pawisa note tih thihin ramdanga India mi awmte a nghawng dante a hrilh. Sharma chuan UK-a India mi awmte tan India pawisa an kawlte an deposit theihna tura Indian bank-te an inhawn phalsak turin a ngen. Hemi hma hian Indian origin dang, MP Keith Vaz pawhin sorkar laipui hnenah ramdang miten pawisa note hlui an dahluh theih hun chu thla ruk tala pawhsei sak turin a lo ngen tawh bawk.