Ramchhung Lawrkhawm

Bengal-a rel chesualah mi pahnih an thi

West Bengal-ah Thawhlehni zan khan Capital Express rel a chesual a, mi pahnih an thi a, mi dang parukin hliam an tuar.

Rel hi zan dar 9 velah Alipurduar district-a Samuktala station bulah chesual≠in, pindan pahnih a let. Chetsualna thlen hnu hian Railway Minister Suresh Prabhu chuan Railway Board chairman chu chhanchhuah hna thawktu tur ngaihtuah nghal tur leh, thil awmdan enfiah turte tir turin a hrilh nghal a ni. Chetsualna thlen chhan hi chhui chian a ni dawn a, mawhphurtute chungah action lak a ni dawn tih Railway Ministry chuan a sawi bawk.

Andaman-ah ruahsur nasa vang-in mi 800 tangkhang

Andaman and Nicobar Island-a Havelock Islands-ah ruahsur nasa avangin khualzin 800 vel an tangkhang mek a, heng mite hruai tur hian Navy lawng lian tirh a ni.

Andaman and Nicobar disaster management chuan Havelock Islands-ah khualzin tam tak an tangkhang thu leh, he hmun hi thlipuiin a nuai mai thei nia sawi a nih avangin, thuneitute hnenah khualzin tangkhangte ṭanpui tur hian a ngen a ni. Havelock hi state khawpui, Port Blair aṭanga km 40 vela hlaa awm a ni. Navy chuan khualzin tangkhangte hruai chhuak tur hian lawnglian pali, INS Bitra, INS Bangaram, INS Kumbhir leh LCU 38 te a tir a, nimin tlai lam khan a thiar zawh hman beisei a ni.

ED-in bank 50-te endik

Enforcement Directorate (ED) chuan pawisa note tih thih a nih hnuah bank-a sum dahluh leh account statement endik hna chu nimin khan bank 10 hnuaia branch 50-ah a nei.

ED team hian khawpui lian, Delhi, Mumbai, Bengaluru, Hyderabad, Kolkata leh Chennai-a November 8 hnu lama bank transaction record leh account statement chu banking auditor-te nen an enfiah. Agency hian dik lo taka thilti tu, Delhi-a Axis Bank hnathawk pahnih chu a lo man tawh bawk.