Congress-in J&K-ah SIR dodal tum

Jammu and Kashmir Congress chuan Union Territory-a electoral roll ennawnna, Special Intensive Revision (SIR) kalpui tur chu theihtawpa lo dodal an tum tih nimin khan an sawi. SIR hi winter season zawhah kalpui tura ruahman a ni.

J&K Congress president Tariq Hamid Karra chuan J&K Assembly-a thla khat awh tur, budget session ṭan dawna SIR kalpui tum chu sawiselin, hei hi inthhlan hmaa roll tihchingpen an tumna a ni, a ti. Congress party chuan an dodal tlat dawn tih a sawi.

Special Intensive Revision hi voter list enfiah leh ennawn a, electoral roll list-a awmte tihdikna tura ruahman a ni. Official-te chuan list-ah thi tawhte, vote nei thei lo leh dan loa ram dang aṭanga pem lutte dah tel an nih lohna turin he hmalakna hi kalpui a ni, an ti. Mahse, Jammu and Kashmir hi khua a la vawh em avangin thlasik laia kalpui chu a fuh lo a, April-May velah neih chu a fuh niin an tarlang.

J&K-ah hian Bangladesh, Pakistan leh Myanmar aṭanga pem lut eng emaw zat electoral roll-ah an inziah luh avangin, roll ennawn tum hi party hrang hrangte chuan an buaipui hle. Kum 2021 khan State Election Commission chuan District Development Council inthlanah, north Kashmir-a seat pahnihah Pakistan-occupied Kashmir-a cheng, voter anga ziah luh, candidate-te an chak avangin inthlan result a lo cancel phah tawh a ni. Seat pahnihah hian a hnuah vote thlak ṭhat a ni zui a ni.

SIR chungchangah Bengal CM-in petition thehlut

Special Intensive Revision (SIR) hi West Bengal-ah kalpui mek a ni a, hetih lai hian state chief minister Mamata Banerjee chuan SIR kalpui a nih dana felfai tawk lo leh inbuatsaih a ṭha lo tiin, Supreme Court-ah petition a theh lut.

CM-in petition a thehluhah hian an state-a SIR kalpui danah Representation of the People Act, 1950; Conduct of Election Rules, 1961; leh Constitution-a Article 324 zawm a ni lo a; langtlang leh felfai taka neih a ni lo, a ti. Court-a petition a theh luh hma hian Banerjee chuan Chief Election Commissioner (CEC), Gyanesh Kumar hnenah ziakin roll ennawn hna kalpui mek chu a felhlel avangin tihtawp tir rih turin a lo ngen tawh bawk. A buaipuitute inbuatsaihna ṭhat loh dante chu Election Commission lam chuan an ngaihven lo niin a sawi. Court hian petition ngaihtuah hun tur hia la sawi lang lo. Banerjee bakah SIR chungchangah hian court-ah petition theh lut tam tak an awm bawk.