SC-in WhatsApp leh a enkawltu Meta hnenah warning pe
Supreme Court chuan nimin khan khawvel huapa messaging platform lian, WhatsApp leh a enkawltu Meta hnenah kum 2021-a app hmangtute privacy data Meta platform danga inthawn darh chungchanga privacy policy a tihchhuah, "take it or leave it" khinna a ngaihtuah. Court chuan mimal data sumdawnna tur thila hmansak chu dan kalh leh pawm theih loh a nih thu an tarlang.
WhatsApp hian kum 2021 January khan user-te chu term of service leh privacy policy tihthar a nih tur thu hi hrilhin, policy thar chu kum 2021 February 8 aṭanga hman ṭan tur a nih thu leh policy thar pawm ve lote chuan plaform hi an hman zui theih tawh loh tur thute an tarlang tel a ni. Competition Commission of India(CCI) chuan kum 2024 khan policy thar chungchang hi chhui chiangin data-te chu Meta enkawl platform danga thawn darh lo tur hian a hriattir nghal a ni.
Meta leh WhatsApp chuan National Company Law Appellate Tribunal(NCLATR) in OTT messaging market-a an thuneihna hmansual avanga thutlukna a lo siam tawh leh CCI in Rs vbc 213 chawi tura a tihna chu khing letin hearing hi nimin khan neih a ni. Court chuan WhatsApp hnenah hian,"Ram mipuite dikna chanvo 'right to privacy' chu 'data sharing' vang mai maiin palzam a thiang lo a, ram danpui zah lohna zawk a ni" a ti. Nimina hearing neihah hian Chief Justice of India Surya Kant chuan WhatsApp chu an privacy policy langtlang tak a nih leh nih loh a zawtfiah bawk.
CJI Surya Kant kaihhruai bench chuan khinna awmte hi hearing a neih hnuah, court chuan mipuite privacy chu sumdawnna thil atana Multinational Coporation(MNC) in an hman chu rem an tih theih loh thu an tarlang a; Chief Justice chuan mipuite data himna ngaihtuah a nih loh chuan court hian platform chu a 'ban' theih thu a sawi.
Thubuai ngaihtuahtu bench chuan WhatsApp chu an privacy policy leh a hnuaia data thawn darhna a kalpui tawhna sawifiahna tur affidavit file tur hian a hriattir nghal a ni. Whatsapp hnenah hian khinna hrang hrangte a chhanna kimchang siam tura hriattirin, thubuai hi February 9-a ngaihtuah chhunzawm a ni ang.