Rahul-a’n mipuite harsatna ngaihthahah PM puh

Congress Vice President Rahul Gandhi chuan Prime Minister Narendra Modi chu pawisa note lian pahnih, Rs 500 leh Rs 1,000 note tih thih chungchangah na takin a bei leh, mipuite harsatna tawh ngaihthahah a puh.

Rahul Gandhi chuan black money leh eirukna do letna tur chhuanlam hmanga chawpchilh taka pawisa note tih thihin mipui nawlpui a nghawng dan te, harsatna a thlen dante chu PM chuan a ngaihthah a ni, a ti. ìHarsatna lian tak an tawh avangin loneitu 100 chuang an thi tawh a, mahse PM chuan nuam takin hun a hmangin a la nui reng thung a ni, a ti. PM hi pawisa tih thih chungchanga debate nei turin Parliament-ah hian a lo kal ngei tur a ni a, a tlanchhiat kan remti ngai lo angî, a ti. PM chuan pawisa tih thih chhan chu a tirah black money tihtawpna tur a ti a, mahse a hnuah a thusawi dan hi thlakin firfiakte sum hmuhna tihtawpna tur, pawisa lem tihtawpna tur a tih hnuah cashless economy tiin a sawi leh a ni, a ti.

PM-in pawisa note tih thih chungchanga thutlukna huaisen thlak tia a sawi chu, thutlukna atthlak tak, ram puma tibuaitu a ni tiin Rahul Gandhi chuan a sawi.

Pawisa tih thih a nih aṭanga a thla khatna, nimin khan eptu party-te chuan ëblack dayí an hmang a, parliament complex-ah eptu party 16-teín lungawi lohna an lantir. PM Modi-aín pawisa note tih thih a nihna chhan a sawi chu
ṭha an tih thu an sawi rualin, inbuatsaihna a fel tawk lo chu an dem thu an sawi. Ramchhunga pawisa leng vel zinga 80% chuang tih thih hian ram mipuite buaina nasa tak a thlen a ni, an ti.

Eptu party-te chuan Parliament-ah debate neih a, vote lak an phut a, he hunah hian Prime Minister pawh tel ngei turin an phut. Mahse Parliament thlasik ṭhutkhawm ṭan a ni aṭangin PM Modi hian House-ah pawisa note tih thih chungchangah engmah a la sawi chhuak lo.

Pawisa note tih thih chungchang avang hian nimina Parliament inkhawm pawh rorel thei loa tihtawp a ni leh. Lok Sabha inkhawm ṭan a ni veleh Congress hruaitu Mallikarjun Kharge chuan hemi chungchang hi sawiho a phut a, mahse Speaker Sumitra Majahan chuan remti loin Question Hour a ṭan nghal a ni. Hei vang hian eptu party, Congress, Trinamool Congress leh Left party member-te chu lungawi loin House laiah an chhuak khawm a, debate neih phutin an au buai zui a ni. Member-te hi khap theih loha an au buai chhunzawm avangin Speaker chuan inkhawm a titawp a ni.