Jaya-i thih vanga rilru na mi 77 an thi tawh

Tamil Nadu-a rorellai, AIADMK chuan an party hotu leh Chief Minister J Jayalalithaa-i thih avangin, an state chhungah mi 77 chu rilru nain an thi niin a tarlang.

AIADMK chuan, Jaya-i thihnain a nghawng nat avanga thi ta chhungte hi ralna, cheng nuai thum ṭheuh pek an tum tih a sawi a, nunna chante hming hi an party Twitter-ah pawh an tarlang a ni.

September 22-a Apollo Hospital, Chennai-a Jaya-i dahluh a nih hnu leh, December 5 zana a thih thu an hriat avanga thi chu mi 77 an tling a ni. Heng mite bakah hian party member pakhat chu, Jaya-i damlo a zual hle tih a hriatin inhal hlum a tum a, a thih hnu hriat a nih hnuah mi dang pakhat pawhin a tuarzia lantir nan a kut zungṭang a tan bawk. Heng mite pawh hi party chuan Rs 50,000 pek an nih tur thu a puang.

Jayalithaa-i hi Thawhṭanni zan dar 11.30 khan lung lam natna avangin a thi a, Thawhlehni khan state chawimawina famkim nen vui liam a ni a, Chennai-a Marina Beach-a MGR Memorial bulah phum a ni.