Ramchhung Lawrkhawm

Chhum zing vangin Delhi pan tur rel khawtlai

Ramchhung hmarlamah chhum a zin nasat avangin rel service te a nghawng buai a, Delhi pan tur rel 94 zet chu darkar eng emaw zatin tihkhawtlai an ni a, rel 16 chu an tlan hun tur sawn a ni bawk.

India Meteorological Department (IMD) in chhum chhah tak zing vang hian zing dar 5.30-ah chuan meter 400 chin a hmuh theih a, dar 8.30 ah chuan meter 100 chin chauh a hmuh theih tawh niin a tarlang. Ni hnih aia tam zing lamah chhum chhah hi a la zing chhunzawm dawn niin an sawi bawk.

RBI-in Rs 100 note thar
ti-chhuak dawn

Reserve Bank of India (RBI) chuan Rs 20 leh Rs 50 note thar tihchhuah a nih tur thu a sawi hnuah, Rs 100 note thar pawh tihchhuah thuai a ni dawn tih a sawi. Note thar tihchhuah a nih hnuah pawh a note hlui-te hi hman chhunzawm theih reng an ni ang.

Rs 100 note thar hi Mahatma Gandhi Series-2005 a ni dawn a, a print kum 2016 leh RBI governor Urjit R Patel signature dah a ni ang. Pawisa note hi eng zat nge print a nih dawn erawh a sawi lang lo.

Punjab CM-in kum 89 a tling

Punjab Chief Minister Parkash Singh Badal chuan nimin khan kum 89 a tling a, ramchhunga CM ṭanglai zinga upa ber a ni.

Kum 1927, December 8-a piang, Parkash Singh Badal hian Punjab CM term ngana a chelh mek. Kum 2007 aṭang khan Punjab-ah thuneihna a la chelh chhunzawm a ni. Kum 1977 khan Morarji Desai-a kaihruai sorkar laipuiah hun reilote minister a lo ni tawh bawk. A fapa Sukhbir Singh Badal chu Punjab deputy CM a ni a, a monu chu Harsimrat Badal chu Union Minister for Food Processing niin, a makpa Adaish Pratap Singh Kairon chu Punjab sorkarah cabinet minister a ni bawk.