Ramchhung Lawrkhawm

Eptuten debate nei turin an inpeih

Eptu party-te chuan parliament session neih mekah, sorkar laipuiin pawisa note lian pahnih, Rs 500 leh Rs 1,000 note a tih thihin ram mipuite chunga nghawng a neih chungchang sawiho turin an inpeih tih an sawi a, hemi rual hian debate neih dan turah sorkar lam chuan khuahkhirhna a siam tur a ni lo, an ti.

Pawisa note tih thih chungchang hi Parliament-ah sawiho an phut a, Prime Minister Narendra Modi pawh tel ngei tura phutin eptute hi hun rei tak session-ah hian rorel thei loin an aubuai tawh a ni. Eptute chuan sawiho a nih hnuah vote lak an phut a, mahse hei hi sorkar lamin a pawm thei lo a ni.

Justice Katju-a’n SC hnenah ngaihdam a dil

Supreme Court judge hlui Markandey Katju chuan Soumya pawngsual thubuai chungchanga a thusawi avangin Supreme Court hnenah ngaihdam a dil.

Justice Gogoi, Prafulla C Pant leh Uday Umesh Lalit awmna Supreme Court bench chuan Justice Katju-aín a blog-ah he thubuaia court rorel dan chu a dik tawk lo nia a tarlan chungchangah hriattirna hi a pe a ni.

India leh Israel thawk dun dawn

India leh Israel chu space research leh cyber security lamah an thawk dun dawn. Ram pahnihte hi tun hma lamin space research leh technology lamah an lo thawk dun tawh a ni.

Israel science, technology and space minister Offir Akunis leh Israel Space Agency (ISA) director Avi Blasberger-te chu India ramah an cham mek a, space research leh cyber security lama ram pahnihten thawhdunna chak zawk siam dan tur te an buaipui a ni. Space partnership hian earth observation, communication leh rocket propulson a huam tel a ni.