Jan Suraaj party-in Bihar-ah inthlan ṭhat phut

Poll strategist hlui, Prashant Kishor-a party din, Jan Suraaj Party chuan Supreme Court-ah kum 2025-a Bihar Assembly inthlan khinna a theh lut a, inthlan ṭhat an phut bawk.

Petition thehluh hi vawiinah Chief Justice of India Surya Kant leh justice Joymalya Bagchi awmna bench chuan a ngaihtuah rin a ni.

Kum 2025-a Bihar assembly inthlanah khan BJP kaihhruaii National Democratic Alliance (NDA) chuan assembly seat 243 awm aṭangin sat 202 an la a, INDIA bloc in seat 35 an la a, Congress chuan party malin seat ruk chiah a la a ni. Party ding thar, Jan Suraaj Party hi a artelukawn a, an candidate tam zawk chuan an dahkham an chawi.

Supreme Court-a petition an theh luhah hian Bihar-a NDA sorkar chu Model Code bawhchhiaah an puh a, inthlan hun puan a nih tawh hnuah Mukhyamantri Mahila Rojgar Yojana hnuaiah hmeichhia voter te hnenah Rs 10,000 an bank account-ah an dahsak tih an sawi. Hei vang hian Election Commission of India chu Constitution-a Article 324 leh Representation of People Act-a Section 123 hnuaiah sorkar laka hma la a, inthlan neih tak chu dik tawk lo tia hnawl tura hriattir turin an ngen.

Mukhyamantri Mahila Rojgar Yojana hnuaiah hian hmeichhiate chu sumdawnna bul ṭanna tur leh, an eizawnna tur kawng dapa turin ṭanpuina Rs 10,000 pek an ni a, direct transfer hmangin an bank account-ah thunsak an ni.

Petition-ah hian Jeevika group aṭanga hamṭhatna dawngtu, hmeichhia nuai 1.8 te polling booth a duty tir an ni chu dan kalh a ni tih puang turin an ngen bawk.