Eptuten sipai hotu thlan dan an sawisel

Sorkar laipui chuan kar kalta Inrinni khan khawmual sipai hotu lu ber atan Lieutenant General Bipin Rawat ruat a nih thu a puang a, Rawat hian a aia senior pahnih a kaisan khalh avangin eptu party-te chuan an sawisel.

Eptute party-te chuan nimin khan Rawat-aín a aia senior pahnih a kaisan khalh theih dan hi sawifiah turin sorkar an phut. Prime Minister Narendra Modi-a kaihhruai BJP sorkarin sipai hotu atana senior ber dah a nih loh chan leh, kum sawmthum zet kalphunga neih tawh a zawm loh chhan an zawt a ni.

Congress hruaitu Manish Tewari chuan, ìSenior zawkte hi dah theih an ni lo em ni, hei hi induhsakna hleihluak vang zawk em ni?î tiin a zawt. BJP kaihhruai NDA sorkar chu chanvo pawimawh chelhtu tur ruat chungchangah sawibuai theih zawnga thil kalpui chingah a puh a, chief vigilance commissioner a ruat dan pawhin sawisel a hlawh hle a ni, a ti.

Central board of direct taxes hotu, KV Chowdary chu hun rei tak tihkhawtlai a nih hnuah CVC hotu atan hian ruat a ni a, hei hi lawyer lar tak Ram Jethlamani leh Prashant Bhushan-te chuan nasa takin an sawisel a ni.

Congress party chuan sipai hotu thar atana ruat, Rwat-a theihna leh ṭhatnate chu an sawisel lo tih an sawi a, mahse amah aia senior pahnih a kalkan theih dan chu hriatchian an duh tih an sawi. Hetih lai hian sorkar laipui chuan Rawat chu tunlai ramchhung dinhmun ngaihtuahin, sipai hotu lu ber atan tlak ber niin a sawi thung.

BJP chuan Congress thusawi hi chhang letin, sorkar chuan inkaih≠hruaina dan a zawm ṭha tih sawiin, Congress chu engmah lo sawi ve thei a ni lo, a ti. Union minister Mukhtar Abbas Naqvi chuan, sorkar laipui chuan a thutlukna siam turah Congress remtihna a lak kher a ngai lo, a ti. Congress chuan central-a thuneihna an nei tawh lo tih an hrethiam thei lo nia a ngaih thu a sawi bawk.

Sorkar laipuiin Rs 1,000 leh Rs 500 a tih thih hnuah BJP leh Congress party te chu ṭawngkamin an inbei nasa hle a, Congress chuan pawisa note tih thih hian ram chhunga mi rethei zawk leh loneitute tan harsatna nasa tak a thlen niin an sawi. Pawisa thi vanga eptute leh sorkar lam inep vang hian Parliament thlasik ṭhutkhawm neih takah pawh rorel mumal loin ni tam tak hun khawhral a ni.

December 31 aṭanga sipai hotu lu ber chelh tura Rawat thlan a nih chungchangah, sorkar chuan ram≠chhung security dinhmun thlirin a
ṭha ber dawn niin a sawi. Hmarlama helpawl intuaithar an awm leh vang te, khawthlang lam biala firfiakte pawikhawihna thleng fo te, hmarchhak dinhmunte thlirin Rawat hi sipai hotu atan a awm ber a ni, a ti.

Siapi hotu hlui, Shankar Roy Chowdhury chuan sipai hotu lu ber ruat chungchangah sorkar laipui chuan thuneihna pumhlum a nei a ni tiin, hemi chungchang hi politics thila kuaiher lo tura a duh thu a sawi.

Mahse eptu party hrang hrang chuan sorkar thutlukna siam hi an sawisel zui tho. Biju Janata Dal hotu Tathagat Satpathy chuan senior zawkte kaisan khalh hi chuan inhnialna tam tak a chawk chhuak zel tih a sawi. Communist Party of India hruaitu D Raja chuan NDA sorkar hnuaia army, CVC leh chanvo pawimawh tur ruat chungchangah chuan inhnialna a awm zel a ni, a ti. Hei vang hian sorkar chuan ruat an nih dante chu chiang takin a sawifiah zel tur a ni, a ti.