IUML-in SC-ah CAB an khing

Citizenship (Amend­ment) Bill  (CAB) chu Parliament in hnihin a pass tak avangin 'law' ah chantir a ni thuai dawn ta. 

Hetihlai hian Indian Union Muslim League (IUML) chuan CAB khinna hi Supreme Court-ah an thehluh avangin court hian a ngaihtuah a ngai dawn a ni. IUML chuan Sup­reme Court-a petition an thehluhah, CAB chu sakhaw behchhana khua leh tui nihna pekna tur a nih avangin ram danpui kalh a ni, a ti. 

Rajya Sabha-a bill sawihonaah pawh Cong­ress hruaitu, P Chidam­baram chuan CAB hi ram danpui innghahna kalh a nih avangin pass pawh ni se, inbeihna chu Supreme Court lamah sawn a ni dawn tiin a lo sawi tawh. Congress hruaitute chuan he bill hi Supreme Court lamah khin zui an tum thu an sawi a ni. 

Congress party thu­puangtu leh senior lawyer, Abhishek Many Singhvi chuan he bill hi khin let a ngai ngei nia a ngaih thu sawiin, court lamah an kal thuai tur thu a sawi. Constitution expert Subhash Kashyap chuan he thil hi court-a buai­pui chi niin a sawi a, "Con­stitution Article 14 chuan dan hmaah mitin intluk­tlanna a pe a ni. Supreme Court chuan insawifiahna pek a remti a, heng an in­sawifiahna te hi rintlak leh pawmtlak a nih chuan fundamental right a palzut lo a ni ang. Mahse dan loa lut leh refugee chungchang sawifiahna hi a rintlak tawk angem tih erawh ngaih­tuah a ngai a ni," a ti.