India-Malaysia in zau zawka thawh dunna tur khuh hawng

Prime minister Narendra Modi chuan thawh dunna huang tihzauhna turin Inrinni liam ta khan Malaysia-ah a zin a, Malaysia PM Anwar Ibrahim nen ram pahnih thawh dunna tur kawng hrang hranga tihzauhna tur ruahmannate nimin khan an khuh hawng nghal.

Nimina ram pahnih hruaitute inkawmnaah hian defence leh security, semiconductor leh sumdawn tawnna huanga thawh dunna tihzauh dan turte an sawi dun a ni.

India leh Malaysia chuan inlaichinna danglam bik an neih thu PM Modi chuan sawiin, ram pahnihte chuan sector hrang hrangah thawh dunna huang zauh chu an in peih ve ve bawk niin a tarlang.

Modi chuan India chu firfiak pawl rawlrala chetna a dona kawngah a dinhmun ngaiah a la din reng thu a sawilang bawk. Ram pahnih chuan firfiak pawl dona kawngah te, intelligence thiamna inhrilhtawn leh tuipui venhimna thawh kawngah pawh an thawh dun zel tur thu PM chuan a sawi. Defence huanga thawh dunna chu awmze nei zawka kalpui leh AI leh digital technology te, semiconductor, health, leh ei leh in lam thlenga thawh dunna tihhmasawn tum a nih thute a sawi lang a ni.

Malaysia hi khawvel ram zinga India mi leh sa tamna ram pahnihna ni mekin, India hnam nunphung leh zia rang pawh ngaih pawimawh a ni. Malaysia PM Ibrahim chuan India nen sumdawnna, invesment, inpawh tawnna leh defence-ahte thawh dunna tihzauh zel an tum thu a sawi lang ve bawk.