Army Chief-in J&K a tlawh

Chief of Army Staff , genreal Upendra Dwivedi chuan kar liam ta Inrinni khan Jammu and Kashmir-a forward area tlawhin, firfiak laka beihpui thlakna kalpui dante a thlir let.

Sipai hotu lu hi Zirtawpnia union home minister Amit Shah kaihhruaia Jammu-a high-level security review meeting-ah a tel a ni. Hemi hnu hian Jammu-a White Knight Headquarters a tlawh a, ramri bul district pahnih - Poonch leh Rajouri te a tlawhin sipai duty-te nen inkawmna hun an hmang. Rajouri-ah hian Counter Insurgency Force (CIF) Romeo headquarters-ah meeting a kaihruai nghal bawk.

Additional Directorate General of Public Information (ADGPI) chuan COAS hi firfiak laka beihpui thlak hna kalpui mek dante chipchiar taka hrilh a nih thu a tarlang. Army Chief pawh hian sipai rank hrang hrangte chu an hna thawhnaa an inpeknaah a fak bawk a ni.

Union home minister Amit Shah pawhin kar liam ta khan ni hnih chamin J&K hi a tlawh bawk a ni. International border leh Bobia leh Gurnam-a Border Security Force outpost-te a fang bawk a, tun hnaia firfiakte beihnaa sipai thi chhungte a tlawh nghal bawk.

Tun hnaiah J&K-ah hian firfiakte chetna a thleng leh fo a, hei vang hian sipaite pawhin firfiak laka beihpui thlak hna hi kalpuiin, Kishtwar leh Udhampur-ah hlawhtling takin beihpui an lo thlak tawh a ni. Official-te chuan thla thum chhungin district pariatah firfiakte chetna a thleng tih an sawi. Tun hnaia Pakistan lam aṭanga dorne rawn luh awm chuan security lamah hlauhthawnna a siam a, hei vang hian UT pumah hian venhiman la pawh uluk zual leh tihkhauh a ni.