India tana thil chhin-chhiahtlak a ni - Prime Minister Modi Indian Constitution chanchina ni lungchhiatthlak ber - Sonia Gandhi

Prime minister Narendra Modi chuan Parliament in hnih, Lok Sabha leh Rajya Sabha-a Citizenship (Amendment) Bill pass a ni ta chu lawmawm a tih thu sawiin, he bill pass a ni ta hi India ram tana thil chhinchhiat tlak a ni, a ti. 

He bill pass hian India in midang khawngaihna leh unau­na a neih a lantir a ni tiin, CAB chuan an sakhaw rinna avanga hun rei tak tihduhdah lo tuar ṭhinte natna chu a chhawk zang­khai sak tawh dawn niin a sawi. 

Prime minister chuan CAB pass a nih theihna tura thlawptu MP zawng zawngte chungah lawmthu a sawi. CAB hi Thawhṭanni zanlai  khan Lok Sabha-ah pass a ni a, a thlawp lamah MP 311 in vote in, a duh lo lamah MP 80 in an vote. Nilaini khan Rajya Sabha-ah put lut leh niin vote laknaah bill thlawp lamah vote 125 tlain, a thlawp lo lamah vote 105 a tla a, Parliament in hnihah bill hi pass a ni ta a ni. 

 

Hetihlai hian Congress interim president Sonia Gandhi chuan Parliament-a CAB pawm a ni ta chu na takin a sawisel. Sonia Gandhi chuan thu­chhuah siamin, India Consti­tution chanchina ni lungchhiat­thlak ber a ni tiin bill hian ram danpui innghahna, mitinte intlukna leh sakhaw thiarhranna awm lohna chu a kalh mai a ni lo a, sakhaw leh hnam tinte zalenna India ram nihna chu a hnawl ta a ni, a ti. BJP-in India ram thendarh a tumna chu Congress chuan na takin a do zel dawn tih a sawi bawk. Khawvel pumah Mahatma Gandhi piancham vawi 150 lawmna neih mek a nih laia ram mipuite ṭhendarh theihna tur bill BJP kaihhruai sorkarin a buaipui tlat  chu thil inkalh tak a nih thu a sawi.