Seychelles ram hnenah puihna sum USD mtd 175 pe dawn

Prime minister Narendra Modi leh India rama cham mek, Seychelle president Patrick Herminie-ten inbiakna zau tak an neih hnuah, India chuan nimin khan Seychelles hnenah hian hmasawnna thlenna tur atana puihna special economic package USD mtd 175 pek a nih tur thu a puang. Ram pahnihte hian sumdawnna, economy, leh security-a thawh dunna neih an remti bawk. Herminie hian ni ruk cham turin India-ah a rawn zin a ni.

Seychelles ram hi Indian Ocean-a India tuipui huam chhung ram ṭhenawm niin, PM Modi chuan ram leilung inzawmna piah lam history, inrintawnna, leh hmalam hun atana thlirna ang khat an neih pui ram a nih thu a tarlang. Hmasawnna atana thawh dunna chu India-Seychelles in ṭhianṭhatna ban pawimawh tak a nih thu a sawi.

India-in Seychelles hnena puihna a pek hmang hian ram hmasawnna tur hna hrang hrang, heng - social housing, mobility, vocational training, health, defence, leh tuipui lama venhimna pekna kawngah a pui thei dawn a ni. Economic package pek tur hi Seychelles-in a ngaih pawimawh leh mamawh zulzuia duan a nih thu official-te chuan an tarlang.

Ram pahnihte inpawh tawnna hi ram mipuite ve ve inkar vang niin, Seychelles-a India mi leh sa chengte chuan ram nunphung leh economic ṭhan lenna tur atan an thawh hlawk hle tih PM Modi chuan a sawi. Ram hrauitu pahnihte inbiakna an neih hnu hian India-Seychelles inlaichinna chuan bung thar a kai niin an sawi.