India leh Canada-in national security atana thawh dun remti

Canada-in an rama Khalistani kalfawr pawl hruaitu, Hardeep Singh Nijjar thihna avanga India a mawhchhiat reng hnu leh an inkar a buai reng hnuah, India leh Canada chuan ram venhimna (national security) atana thawh dunna tur induan ṭawm an remti. Inbiakna nei tur hian national security advicer Ajit Doval chuan Inrinni liam ta khan Canada a tlawh a, Deputy Clerk leh National Security and Intelligence Advisor to Canada PM, Nathalie Drouin nen an inbia a ni.

Doval-a'n Canada a tlawh hi ram pahnihte'n security huanga thawh dunna tura inbiakna hun atana hman a nih piah lamah, kumin March thlaa India ram tlawh tur, Canada prime minister Mark Carney rawn zinna tur atana inpuahchahna a ni nghal a ni. Ram pahnihte hian ram leh mipuite himna thlen thei zawnga hma lak chu an thil tum ber a nih bakah, national security huanga thawh dunna tih hmasawnna tura kaihhruaina duan inṭawm tawn an remti bawk.

Meeting-ah hian Doval leh Drouin-te chuan ram chhung ve vea security leh law-enforcement liaison officer neih leh, an hnuaia agency-te thawh dunna ṭha siam thei tur dinte an remti. Thawh dunna kaltlang hian India leh Canda-in harsatna an ram pahnih nghawng ve ve thei awm chungchangah chak zawkin hriattur pawimawhte an inhrilh hre zung zung thei tawh dawn a ni.

Dan phal loh ruihhlo tawlhrukna hrang hrang tukdawlte chu thiltum zinga mi a ni a, hei bakah hian cybersecurity policy atana thawh dunna tur mumal siam pawh an remti bawk.