Parliament Budget session thawh khatna titawp; March 9-ah ṭhutkhawm thawh hnihna ṭan dawn

Parliament budget session thawh khatna chu nimin khan tihtawp a ni a, March 9-ah ṭhutkhawm thawh hnihna ṭan a ni ang. Nimina Lok Sabha ṭhutkhawmah petroleum minister Hardeep Singh Puri chu Epstein file-a a hming a lan ve avangin house chhungah eptu pawl te'n bang tura ngiatin in auh buaina a chhuak a, hemi hnuah ṭhut khawm hi tihtawp a ni zui nghal.

Puri leh Epstein-te email hmanga an inbiakna hmuh chhuah a nih avang hian eptu pawlte chuan minister chu insawifiah tur leh minister a nihna aṭanga bang turin an nawr. Puri erawh chuan Epstein nen eng emaw changa an inbiak ṭhin ngei thu sawiin, mahse, an inbiak ṭhinnate chu Epstein-a pawikhawih lian takah khan a inhnamhnawih ve tihna a nih loh thu a sawi ve thung.

Congress party chuan ṭhutkhawm tihtawp a nih hnu hian parliament complex huam chhungah Puri leh Epstein-te inlaichinna neih duh lohna an lantir zui nghal a; hemi rual hian BJP MP Nishikant Dubey-a'n Rahul laka motion a theh luh chungchang chu na takin an chhang let bawk. Puri bakah Anil Ambana chu Epstein file-ah hian a hming hmuh ve a ni a, hemi avang hian Rahul hian tun thlenga man a la ni lo chu mak a tih thu a sawi a ni.

Puri chuan an beihnate chu thu belhchian dawl lo leh nghah chhan mumal nei lo, thu puarpawleng mai mai a nih thu a sawi a, a bik takin Gandhi-a'n a puhnate chu thu belhchian dawl lo thil mai mai a buaipui ṭhin vang a ni, a ti. Epstein nen a inzawmna chu kum riat liam ta thil a nih thu sawiin, mipat hmeichhiatna lam thil reng reng nen inzawmna a neih ve loh thu a sawi lang bawk. Kum riat chhung khan vawi li emaw vawi thum emaw chauh an inhmuh thu a sawi lang tel bawk.