Muslim pawlin Vande Mataram chungchanga hriattirna siam duh lo

Sorkar laipuiin national song, Vande Mataram chungchanga kaihhruaina a siam tharah, zirna in leh official function-ah a chang parukte sawi chhuak vek zel tura a tih chu Muslim pawlten an duh lo. All India Muslim Personal Law Board kaihhruaiin Muslim pawl hrang hrang chuan sorkar chu hriattirna a tihchhuah tawh sut tura phutin,a sut lo a nih chuan Supreme Court-ah an kal dawn tih an sawi.

Board thupuangtu, S.Q.R Ilyas chuan school leh official function-a Vande Mataram chang zawng zawng sawi chhuak zel tura tih chu ram danpui nen pawha inmil lo a ni tih sawiin, sakhaw zalenna leh Supreme Court rorelna palzutna a ni, a ti.

Ilyas chuan Vande Mataram-ah hian Durga leh Hindu pathian dangte biakna leh fakna a tel a, hei hi Muslim rin dan nena inkalh a nih thu a sawi. "Pawm theih a ni lo. Muslim chuan pathian pakhat, Allah chauh an bia a, Islam sakhaw dana pathian dang biak phal a ni lo," tiin India court-te pawhin a chang zawng zawng sawi kher loin, a sawi tur chin pawh an lo bithliah tawh a ni, a ti. Sorkar laipui chu a thutlukna siam sut leh nghal turin a phut.

Jamiat Ulama-i-Hind president Arshad Madani pawhin sorkar thiltih dan chu sakhaw tlem zawkte zalenna beihna a ni a ti. Vande Mataram a chang ṭhenkhat chu sakhaw pakhat rin dan behchhana siam a ni a, hei vang hian pathian pakhat chauh ringtute rin dan nena inkalh a ni, tiin a sawi ve bawk.

Board general secretary, Mohammed Fazlur Rahim Mujaddidi chuan sakhaw zalenna ringtu sorkar chuan sakhaw pakhat rin dan chu sakhaw dang zuituten an zawm ve vek turin a ti tur a ni lo. Hei hi Muslim chuan an pawm ve thei lo tih a sawi a ni.