Bangladesh-in India nena an inkar siamṭhat duh

Bangladesh-a parliament inthlanpui neih zawh taka sorkar thar siam tura thlan tlin, Bangladesh Nationalist Party (BNP) chuan India nena an inkar siamṭhat a duh. BNP chairman leh Bangladesh prime minister thar tur, Tarique Rahman-a advisor Humayun Kabir chuan ram pahnih hlawkna tel theih zawnga inremna neihte siam ṭhat an duh thu a sawi.

Kabir chuan Bangladesh-a Sheikh Hasina kaihhruai party Awami League-in thuneihna an chan tawh loh thu sawiin, India chuan an rilru put hmang thlaka mipui te'n an thlan thar BNP chu an thawhpui a ngaih tur thu a tarlang. Awami League hi kum 2024 August-a Hasina thuneihna hnuaia zirlai pawl nawrh huaihawta mi 1,500 chuang an thih avang khan 'firfiak pawl' anga ngaih a nih tawh thu a tarlang bawk.

India sorkar chuan an ramri huam chhungte chu Hasina leh Awami League kaihhnawihin an hmang ṭangkai em tih finfiah tura a duh thu tarlangin, heng thilte hi a thleng a nih chuan Bangladesh dinhmun nghet mek chuan a tuar phah thei dawn tih a sawi.

Hetih laiin External Affairs Ministry thupuangtu, Randhir Jaiswal chuan India chu Bangladesh mipuite ṭhatna tur a duhsak thu sawiin, remna leh muanna, democracy, dinhmun ngelnghet leh huam zau zawka ram a kal theihna tur leh awmze nei zawka hmalakna kalpui a nih theihna turin India pawh a inhuam tih a sawi.

February 17 hian Bangladesh prime minister thar atan Tarique Rahman hi lak luh a ni dawn a, he huna telpui tur hian prime minister Narendra Modi pawh an sawm a ni.