Rajasthan-a factory kangah mi 8 an thi

Rajasthan-a Alwar district-a Bhiwaldi industrial area-ah nimin zing khan dan phal lohah halpuah factory siamah kangmei a chhuak a, hnathawktu pariat an kang hlum. Kangmei chhuah lai hian thawktu mi 25 vel an awm..

Factory building hi a neitu hian mi dang a luah chhawn tir a, a luahtu hian phalna nei loin halpuah siamna hmun atan an hmang a ni. Factory-ah hian thil puak ring tak hriat a nih hnuah, gun powder leh cardboard an dan khawmte chu nasa takin a kang zui a ni. Kangmei chhuak hi a nasat avangin a bul hnaia chengte chu sawn chhuah an ni a, electric supply pawh tihtawp a ni nghal bawk.

Kangṭhelhtuten darkar eng emaw zat hnuah kangmei chhuak hi an ṭhelh mit thei a ni. Ruang pariat kang hlum an la chhuak a ni. He hmuna thawkte hi Uttar Pradesh leh Bihar mite an ni.

Chief minister Bhajan Lal Sharma chuan vanduaina thleng chu pawi a tih thu leh, thi chhungte a tawrhpui thu a sawi. Hliam tuarte pawh enkawlna ṭha ber pe turin a hriattir a ni. Hemi rual hian dan phal loha halpuah factory siam a nih chungchang hi chhui chiang tura thupek tihchhuah a ni nghal bawk.

Police-te chuan kangmei chhuah dan hi an chhui a, a chhan tak erawh hriat chian a la ni lo. He thil thlen hnu hian thuneitute chuan industrial unit dangte pawh kangmei leh chhiatna dang thei laka an hmun a him em tih ennawn turin an hriattir nghal a ni.

Prime minister Narendra Modi chuan X-ah kangmei chhuaka thi chhungte a tawrhpui thu leh, hliam tuarte pawh an dam leh thuai a beisei thu a tarlang.