President-in CAB a pawmpui Act ah chantir a ni ta

President Ram Nath Kovind chuan Ningani zan khan Par­liament in hniha pass tak, Citizenship (Amendment) Bill chu pawmpui ta a, he bill hi Act ah chantir a ni ta a ni. 

CAB hi Thawhṭanni zan khan Lok Sabha-ah pass a ni a, Nilaini zanah Rajya Sabha-ah pass a ni ve leh bawk. Pass a nih hma hian Parliament in hnihah hian hun rei tak sawiho a ni bawk. Ningania official hriattirna tihchhuah chuan Citizenship Amendment Act (CAA) hi hman ṭan nghal a nih thu a tarlang. 

He Act hnuaiah hian Pakistan, Bangladesh leh Afghanistan aṭanga Hindu, Sikh, Buddist, Jain, Parsi leh Kristian, an rama an sakhaw zui vanga tihduhdah leh  harsatna tawk, December 31, 2014 hma lama India rama rawn lutte chu dan loa rawn pem lut anga ngaih an ni dawn lo a, India khua leh tui nihna pek theih an ni dawn a ni. Khua leh tui nihna pekna tura India rama kum 11 tal an khawsa  phawt tura lo tih tawh chu thlakin, kum nga chinah bithliah a ni. 

CAA hi hmarchhak biala Inner Line Permit (ILP) system hmanna state pathum - Arunachal Pradesh, Nagaland leh Mizoram-ah hman a ni dawn lo a, hei bakah hian Assam, Meghalaya leh Tripura-a tribal area-ah hman tel a ni lo bawk ang.