India- France thawh dunna ‘Special Global Strategic Partnership’ ah tihmasawn

India rama cham mek, France president Emmanuel Macron leh prime minister Narendra Modi-te chuan Thawhlehnia inkawmna an neih hnuah, India-France thawh dunna chu ‘Special Global Strategic Partnership’-ah tihmasawn a nih thu an puang. Hei bakah hian India-France Year of Innovation' atana kawng hrang hranga thawh dunna turte an tlangzarh nghal bawk.

Year of Innovation kaltlang hian ram pahnihte hian technology, defence, clean energy leh hnam nunphungahte thawh dunna thuk zawk siam an tum a ni. Hruaitu pahnihte hian inkawmna an neih hnua thuthar lakhawmtute an kawmnaah thuchhuah inṭawm siamin, inremna hrang hrang 21 an neih thu an tarlang. Hei bakah hian ram pahnihte thawh dunna neih leh kum 2047 atana hmachhawp inṭawm neihte thlirletna neih theihna turin Foreign Minister Dialogue chu kumtina vawikhat tal neih tum a nih thu an puang bawk a ni.

India-France Year of Innovation tlangzarh thar hmang hian ram pahnihte hian thil siamchhuah kawngah nasa zawkin an thawk dun thei dawn a; reseacher inpawh tawnna, entreprenuers, zirlai leh investor-te thlenga inzawmna nghet a siam theih beisei a ni. Hei bakah hian thawh dunna hmang hian startup changtlung, leh MSME network ṭha thlenga a nghawng chhuah theih beisei a ni a, India leh France mithiamte tana thawh hona ṭha tak a siam theih rin a ni bawk.