Parliament in hnih inkhawm titawp lailawk

Nimina Lok Sabha leh Rajya Sabha rorel inkhawm chu Rahul Gandhi thusawi chungchanga inhnialbuaina leh, hmarchhak biala Citizenship Amendment Bill (CAB) duh loh vanga buaina thleng mek chungchang avanga inhnialna thleng vangin inkhawm tihtawp lailawk a ngaih phah. 

Lok Sabha rorel inkhawmah Congress hruaitu, Rahul Gandh-a'n Jharkand-a election rally-a India rama pawngsualna thleng chungchang a sawidanah BJP member-te lungawi loin an aubuai a, hei vang hian darkar chanve vel rorel inkhawm tihtawp a ngaih phah. BJP member te chuan Gandhi chu a thusawi avang hian ngaihdam dil turin an phut a, a thusawi chu India rama hmeichhiate tana thil zahthlak tak a ni, an ti.

BJP member-te Rahul Gandhi thusawi avanga lungawi loa an au laiin, eptu member-te chuan dik taka rorelna kalpui an duh thu leh, Rahul Gandhi pawh insawifiahna hun pe tura an phut thu sawiin an lo au let ve thung a ni. Hetianga an inauhbuai lai hian House-ah prime minister Narendra Modi leh Rahul Gandhi-te pawh hi an awm a ni. 

Rajya Sabha-ah chuan Trinamool Congress MP Derek O'Brien chuan CAB avanga hmar­chhak biala buaina nasa tak thleng mek chungchang a sawichhuak a, mahse chairman Venkaiah Naidu chuan sawi zawm phalsak loin thu ngaihtuah tura awmsa chu a chhawpchhuak lui a ni. Hetihlai hian Congress MP-te chuan TMC MP an thlawpna rawn lantirin, a hnuah eptu party dangte pawn an rawn zawma, Citizenship Act an duh loh thu te, hmarchhaka tharum thawhna thleng mek chungchangte an rawn aupui a ni. Chairman hian memberte hi a khap daih theih loh avangin inkhawm tihtawp lailawk a ngai ta a ni.