Police leh security lama thawkte 'honey-trapping' lakah fimkhur turin chah

Bureau of Police Research and Development (BPR&D) chuan ram chhunga security leh police hna thawktute chu Pakistan thlawp intelligence aṭanga inbumna, "honey-trapping" laka fimkhur turin a chah. Security leh police-te himna atan hian Standard Operation Procedures (SOP) pawh a tichhuak nghal bawk.

BPR&D-in ram puma security leh police-te hnena thurawn a tihchhuahah hian thawktute chu an official identity emaw hnathawhna lam kimchang emawte chu social media lama tarlang tam lo turin a chah. Intelligence agent-te chuan fake account siamin security staff-te chu sorkar thurukte zawh chhuah an tum ṭhin tiin fimkhur tur hian an chah a ni.

SOP tihchhuahah hian officer-te chu online lama chetla tam lo tur te, an account-te chu an mi rin zawngte chauh hmuh theih tura indah turin leh hmelhriat loh friend request pawh hnawl zel turin, a ti. Hei bakah personal leh professional account pawh thlunzawm lo tur hian a hriattir a ni. Kaihhruainaah hian cyber safety lam ngai pawimawh turin thawktu zawng zawngte chu a hriattir bawk.