Loneitu 60 thihnain sorkar a tizak pha lo : Rahul Gandhi

Republic Day nia  loneituten Delhi khawpui chhung pana tractor rally neih an tum chungchangah sorkar laipuiin Supreme Court-a affidavit a thehlut chungchangah Congress hruaitu Rahul Gandhi chuan BJP kaihhruai NDA sorkar chu na takin a sawisel. 

Sorkar laipuiin affidavit a thehluhah hian 'Republic Day parade tihbuai a nih chuan ram tana thil zahthlak tak a ni dawn a ni' tiin a tarlang. Loneitute hian farm law duh lohna lantira nawrh an huaihawt mekah, sorkarin an thil phut a tihhlawhtling lo a nih chuan Republic Day niah tak lungawi lohna lantir nan Delhi khawpui bakah ram chhunga khawpui hrang hrangah tractor rally huaihawt an tum thu an lo sawi tawh a ni. 

Rahul Gandhi chuan sorkar affidavit thehluh chungchang hi sawiin, "Nawrh huaihawt chhunga loneitu 60 chuang thihna thleng chuan prime minister Narendra Modi kaihhruai sorkar chu a tizak pha lo a, hrehawm pawh a ti lo. Mahse tractor rally neih tum erawh chuan a tibuai hle thung a ni," a ti. Loneitute hian nikum November thla tawp lama tiam chin awm loa nawrh an huaihawt hnu aṭang loneitu 60 chuang an thi tawh tih an sawi. An zinga ṭhenkhat chu mahni intihlum an ni a, ṭhenkhat erawh chu khawvawt tak hnuaia inchhungah pawh tawmlum thei loa Delhi border-a nawrh an huaihawt avanga an taksain a tuar loh avanga thi te an ni. 

Supreme Court chuan Thawhlehni khan farm law thar pathumte hi hmang rih lo turin a dan sak a, sorkar laipui leh loneituten inremna an siam theihna atana hma la turin member pali awmna committe a din bawk. Mahse committee member atana ruatte a hi hma pawha farm law thar lo thlawptute an ni a, hei vang hian eptute pawhin an sawisel zui nasa hle.