Vaccine duh zawk thlan la phalsak lo

Union health mi­nistry chuan tunkar Inrinni aṭanga ram chhunga Covid-19 vaccine pek chhuah kal ṭanpui­na turah, vaccine dawng hmasa tur healthcare leh frontline worker-te chuan vaccine duh zawk an thlang thei rih lo tih a sawi. 

Sorkar chuan emergency-a hman turin vaccine pahnih, Oxford-AstraZeneca leh Serum Institute of India, Pune siam Covishield leh Hyderabad-a Bharat Biotech leh Indian Council of Medical Research siam Covaxin-te a lo pawm tawh a ni. 

Health ministry, ICMR leh Niti Aayog official-ten joint press conference an buat­saihah, vaccine pek chhuah tur hi dose hnih lak a ngai dawn a, ni 28 kar danah lak a ngaih thu an sawi. Vaccine dawng hmasa tura tihte hian an lak hun hma ni hnihah message an dawng ang. 

Official-te chuan sorkarin vaccine semchhuahna tura IT platform a siam, Co-Win app chu mipui nawlpui hman turin la tlangzarh lo mah se, vaccine dawng hmasa tura tih mi vaibelchhe khat vel chu ziahluh an ni tawh tih an sawi. 

Inrinni aṭang hian ram pumah Covid-19 vaccine pek chhuah hi ṭan a ni dawn a, healthcare worker vaibelchhe khat vel hnenah pek hmasak ber niin, frontline worker vaibelchhe hnih leh kum 50 chung lam leh natna benvawn nei mi vaibelchhe 27 velin an dawng chhunzawm ve leh dawn a ni. Sorkar laipui chuan vaccine pek chhuah tura ṭul leh pawimawhte chu state tinte chuan an peihfel tawh a beisei thu a sawi.

Sorkar laipui chuan SII hnen aṭang hian vaccine dose vaibelchhe 1.1 leh Bharat Biotech hnen aṭangin vaccine dose nuai 55 lei turin Thawhṭanni khan a inremna a ziahpui. Thawhlehni aṭang khan vaccine hi phurh chhuah ṭan niin, Thawhlehni tlai dar 4 thleng khan Covishield dose nuai 54 cuang chu national leh state-level vaccine store-ah phurh thlen an ni tawh a ni. Vaccine sem chhuah tur hi  vawiinah  state leh UT zawng zawngah phurh thlen hman tura tih a ni. 

Serum Institute chief executive Adar Poonawalla chuan sorkar ngenna angin vaccine an pek chhuah hmasak, Covishield dose makataduai 100 chu dose khat Rs 200 zelin an tihtlawm sak tih a sawi a, tax lak a nih chuan Rs 220 a ni thung ang. Private market lamah phalna an neih hunah zawrchhuah a ni dawn bawk tih a sawi a, mahse private market-ah chuan a man hi Rs 1,000 a ni dawn thung. Ram dang aṭangin pawhin vaccine supply tura ngenna an hmu tawh a, mahse India ram chu an dah pawimawh hmasa ber a, India-in a mamawh ang chu an pe phawt dawn tih a sawi. Covaxin chu dose khat Rs 309.5 a ni dawn  a, tax lak a nih loh chuan Rs 295 a ni thung ang.