Karleh aṭangin Delhi-ah school hawng dawn

India ram khawpui Delhi-a school zawng zawng chu karleh Thawhṭanni aṭang hi chuan hawn phalsak an ni leh tawh dawn a, class 10 leh 12-te chu school kal an phalsak leh tawh dawn a ni. 

May 4 hian Central Board of Secondary Education (CBSE) board exam ṭan a nih tawh dawn avangin hemi thlir chung hian class 10 leh 12 te chu school an kal phalsak an ni leh ta niin an tarlang. Delhi sorkarin a tarlan dan chuan school chuan attendance la dawn tho mah se school kal leh kal loh turah erawh innawr luihna a awm dawn lo.

Delhi Education Minister Manish Sisodia chuan an nu leh pate'n an remti a nih chauhin zirlaite chuan school an kal thei dawn tih sawiin innawr luihna engmah a awm dawn lo a, class 10 leh 12 zirlaite chu practical, project leh counselling nei tura school kal phalsak an ni dawn tih a sawi a ni.