SC-in SIR document list aṭanga Aadhaar paih tura ngenna hnawl

Supreme Court chuan Special Intensive Revision (SIR) kalpuinaah khua leh tui nihna finfiahna, identity proof atana Aadhaar number pawm tel a nihna paih tura ngenna chu a hnawl. Representation of the People Act in Aadhaar-a 12 digit unique number chu identity proof atan a pawm a ni, a ti.

SIR-ah Aadhaar pawm tel lo tura ngenna advocate Ashwini Kumar Upadhyay chuan theh lutin, a bikin border area-ahte Aadhaar card lem siamchawp a awm fo niin a sawi a ni. Chief Justice of India Surya Kant leh justice Joymala Bagchi awmna bench chuan Thawhlehni khan petition theh luh hi ngaihtuahin, Representation of the People Act in identity proof atana Aadhaard number a pawm tel chhung chuan court tan dan lo zawm mai loh chu thlan tur a awm lo tih an sawi. Representation of the People Act of 1950-a Section 23 chuan Aadhaar number hi Electoral Registration Officer-ah khua leh tui nihna finfiahna atan a hmang thei ang a ti a ni.

Justice Bagchi chuan hemi chungchang hi an lo sawi ve theih a ni lo a, hei vang hian sorkar laipuiah Representation of the People Act siamṭha tura ngen zawk turin Upadhyay chu a hrilh. A sawi anga Aadhaar card lem siamchhuahte a awm ṭhin a nih phei chuan dan chu siamṭhat ngei a ngai a ni, tiin an tarlang. Chief Justice Kant chuan hemi chungchang hi ngaihven ngai tak a ni tiin, mah se petition thehluttu chuan a forum dik lo zawkah a thlen a, court-ah ni loin sorkarah zawk thlen a ngai a ni, a ti.