EC-in West Bengal final voter list tichhuak

Supreme Court thupek angin, Election Commission of India chuan Inrinni liam ta khan West Bengal-a Special Intensive Revision (SIR) neih a nih hnuah final voter list a tichhuak. List-ah hian vote nei awm zat chu vaibelchhe 6.44 an ni.

Chief electoral officer Manoj Kumar Agarwal chuan draft list tihchhuahah vote nei hi vaibelchhe 7.08 an ni a, SIR kalpui a nih hnuah final list-ah hian mi nuai 5.46 paih an ni tih a sawi. Draft list-ah khan nuai 58 chuang paih an lo ni tawh bawk a, state voter list aṭanga paih hi nuai 63 chuang an tling tawh a ni.

Official-te chuan list aṭanga paihte chu thi tawh, insawn leh, an awmna chin chhui zui theih tawh lohte an ni tih an sawi a, list hi a dik thei ang bera siam tura an beih thu leh, dik lo an hmuhte chu a theih anga ranga an siamṭhat thu an tarlang. List tihchhuahah hian mi nuai 60 chuang chu chinfel ngai tia chhinchhiah an la ni a, hei pawh hi tihfel thuai an tum tih Agarwal chuan a sawi.

Bengal Assembly-a Leader of Opposition, BJP hruaitu Suvendhu Adhikari chuan SIR kalpui chuan an state-a rorellai, Trinamool Congress party a nghawng na dawn hle tih a sawi a, "Voter nuai 63 paih an nih bakah, a bak nuai 60 chuang pawh ennawn mek an ni. Bhownipore bialah chuan Mamata Banerjee thlang tling tur voter an nei tawh lo ang," a ti. Chief minister Mamata Banerjee bial, Bhowanipore-ah hian list aṭangin voter 47,111 paih an ni.

Hetih lai hian final list-ah Naihati Municipality ward No. 4 Trinamool councillor Sushanta Sarkar leh a nu hming chu paih nia sawi a ni a, hei vang hian Trinamool Congress lam chuan list hi an sawisel nghal a ni. Vote nei ngei mi dang tam tak pawh paih an nih ngei an rin thu an tarlang.