Parliamentary Panel hmaah RBI hotuin thu a sawi dawn

Reserve Bank of India (RBI) Governor Urjit Patel chuan December 22 hian Parliament Committee on Finance hmaah, Rs 500 leh Rs 1,000 tih thih a nih chungchang leh nghawng a neih dante a sawifiah dawn.

Chawhma dar 11-ah Parliament annexe building-ah meeting hi neih a ni ang.

November 8 aṭanga Rs 500 leh Rs 1,00 note tih thih a nih aṭang khan, sorkar laipui chuan pawisa note indaih loh avanga mipuite harsatna sutkian dan ngaihtuahin, digital payment lam chak zawka kalpui turin hma a la a ni.

Ramchhunga sum leng zinga 86% dawn chu Rs 500 leh Rs 1,000 note hi a nih avangin heng note pahnih tih thih a nih avang hian mipuiten harsatna an tawh phah nasa hle. RBI leh sorkar laipui chuan mipuite hnenah pawisa note a tam tawk tiin sawi reng mah se, sum lakchhuah theih zat bithliah a nih avangin mipuite buaina hi a la kiang thei lo.

RBI chuan pawisa note tih thih a nih hnuah bank-in a dawn zat chu cheng vaibelchhe nuai 12.44 a tling tawh niin kar hmasa khan a sawi. November 8 aṭang khan bank counter leh ATM aṭanga pawisa pek chhuah chu cheng vaibelchhe nuai 4.61 a tling tawh bawk. RBI deputy governor R Gandhi chuan pawisa note tih thih a nih aṭangin RBI chuan banknote hrang hrang tluklehdingawn 21.8 a pe chhuak tawh niin a sawi.