Pawisa tih thih vangin mi tam takin hna chan mai thei

Delhi Congress hotu Ajay Maken chuan, sorkar laipuiin pawisa note lian pahnih a tih thih avangin mipuite chungah harsatna lian tak a thleng mek tih sawiin, Delhi-a unorganised sector hnuaia thawk mi nuai 48 zet chuan an hna an chan phah thei a ni, a ti.

Congress party chuan pawisa thi vanga mipuiten harsatna nasa tak an tawh mek duh lohna lantirin December 24 hian Jantar Manatar aṭang a, Parliament House thlengin kawngzawh huaihawt an tum a ni.

Maken chuan press conference-ah hemi chungchang hi sawiin, pawisa thiin a nghawng buai avangin Delhi-a inhlawhfaa awm hnathawktu mi 15,000 vel chu nitin an khaw lamah an kir a, hei hian Delhi-a hmasawnna hna thawh hrang hrang pawh a nghawng nasa hle a ni, a ti.

Delhi Pradesh Congress Committee chuan small-scale industry association hrang hrangte chu kawmin, pawisa tih thihin harsatna a thlen dante an sawipui a ni. Pawisa tih thih a nih avang hian nitina inhlawhfa tam takin sum lachhuak thei loin, rilṭamin an awm phah a, inhlawhfaa Delhi-a awm mi tam tak chu an khaw lamah an kir a ngaih phah a ni, tiin Maken chuan a sawi. Delhi Chief Minister Arvind Kejriwal-a hnenah pawh hnathawktute harsatna tawh chungchang chu ngaihtuah tura ngenna lehkha a thawh tawh tih sawiin, mahse tun thlengin a chhan a la hmu lo tih a sawi bawk.