IT-in TN Chief Secretary chenna in dap

Income Tax Department chuan nimin khan Tamil Nadu Chief Secretary Rama Mohana Roa-a chenna in an dap.

IT official-te hian zing dar 5.30 khan Chennai-a Rao-a chenna, 6th street, Anna Nagar an thleng a, an dap nghal a ni. Rao hi Tamil Nadu sorkara civil servant senior ber a ni.

Chennai-a Rao-a chenna in bakah, a chhungkhat te in 12 pawh dap a ni tawh bawk a, hengte hi Chennai bakah Bangalore leh Chittoor a mite an ni.

IT department chuan tunhnaiah sumdawng lian pathum. J Shekhar Reddy, Srinivasalu leh Prem-te kut aṭangin rangkachak kg 177 leh pawisa fai cheng Rs 500 leh Rs 1,000 note hlir cheng vaibelchhe 96 leh, pawisa note thar cheng vaibelchhe 34 an lo man tawh bawk. Reddy hi contractor a ni a, Tamil Nadu sorkar hna a enkawl ṭhin a, Tirupati temple board of trustees member a ni bawk.

Rama Mohana Rao hi kum 2016 June thla khan Chief secretary atan hian dah a ni a, a hna bakah vigilance commissioner leh administrative reforms commissioner hna a chelh kawp bawk.

Rao hi pawisa note thi, note thara thleng chungchangah a inrawlh nia puh a ni a, hei hi contractor an man takte thu an zawhnaah an sawi nia tarlan a ni. Rao-a lakah hian Prevention of Money Laundering Act hnuaiah thubuai ziah luha ni a, enforcement directorate official-teín thu an zawtfiah ang.

DMK Secretary MK Stalin chuan IT department-in an state chief secretary chenna-in dap a ngai chu an state tana thil zahthlak tak a ni tih a sawi.

Trinamool Congress hruaitu, West Bengal Chief Minister Mamata Banerjee-i chuan Tamil Nadu CS chenna in dap a nih chungchangah Prime Minister Narendra Modi-a chu politics-a phuba lak chingah leh, state inrelbawl dan tihbuai tumah a puh. Sum lakhawmtua puh, BJP president Amit Shah leh midangte dap an nih ve loh chhan a zawt let bawk. Eirukna thleng ṭhin chu a dem thu a sawi rualin, Banerjee-i chuan central agency-teín TN CS chenna in an dap chu civil services ngaih pawimawh lohna a ni, a ti.