Finland President-in India rawn tlawh

Finland president Alexander Stubb chu ni li cham turin nimin khan India a rawn thleng a, a cham chhung hian ram pahnihte kawng hrang hranga thawh dunna turah inbiakna neih a ni ang. Stubb hi senior official, sumdawng hotu, leh minister eng emaw zatin an rawn zui a ni.

Stubb leh prime minister Narendra Modi-te chu vawiin hian an in kawm nghal dawn a, sector hrang hranga thawh dunna tur Memorandum of Understading(MoU) an ziah beisei a ni.

President Stubb hian sumdawnna, investment leh critical technology huangah India leh Finland thawh dunna tur hi ram hruaitute nen sawi ho tum a ni a; hei bakah hian intlawh tawnna hian ram pahnih inkar tihchak chu a thil tum lian zingah a tel tih a sawi. Stubb hi vawiina neih tur Raisina Dialogue hawnna inkhawmah khuallian a ni nghal dawn bawk.

External Affairs Ministry thupuangtu, Randhir Jaiswal chuan social media kaltlangin president Stubb a lo lawm thu a tarlang a, India a rawn tlawhna chuan ram pahnih thawh dunna a tihchak phah tur thu sawiin, India leh Finland inṭhian ṭhatna chuan thuk taka zung a kaih thu a tarlang. Stubb hian a cham chhungin Mumbai a tlawh dawn bawk a, Mumbai-ah hian sumdawng lian hruaitu hrang hrang nen inkawmin, Inrinni ah Finland-a pan leh nghal ang.