Speaker-in privilege panel member atan MP 15 ruat

Lok Sabha speaker Om Birla chuan Thawhlehni khan Parliament member nilai mi 15-te chu Committee of Privileges member atan a ruat a, committee hi kal ṭanpui nghal tura tih a ni bawk. Committee chair atan union law minister hlui, BJP MP Ravi Shankar Prasad chu ruat a ni.

Speaker-in panel member atana a rawtte a puan hnuah, member tura a rawt zinga mi Congress MP Manickam Tagore chuan suspend lai a nih avangin panel meeting-ah hian a tel theih loh tur thu a sawi zui nghal. Panel member atana rawt zingah hian Brijmohan Agarwal (BJP), Tariq Anwar (Congress), TR Baalu (DMK), Kalyana Banerjee (TMC), leh Shrirang Appa Chandu Barne (Shiv Sena) te pawh an tel.

February 10, 2026 khan 18th Lok Sabha-ah kum hnih chhung privileges or ethics panel hi a awm tawh lo tih media ten an report a, hemi hnuah committee hi din tum a ni ta a ni. He committee hi Parliament kalphung leh inkaihhruainate bawhchhiat a nih leh nih loh dante enfiahtu a ni. An zirchian hnuah member, dan bawhchhiate laka hremna kalpui dan tur rawtna te an siam ṭhin. MP-te zahawmna, zalenna leh thuneihna humhimsaktu atana tih a ni a, hemi rual hian House chhunga member-te chet danah dan pel leh bawhchhe zawnga thiltih awmte a enfiah bawk ṭhin.

17th Lok Sabha-ah thla li chhungin privileges panel hi din nghal a ni a, tun ṭumah erawh kum hnih chuang hnuah din a ni ta chauh a ni. 18th Lok Sabha-ah hian tun thlengin ethnics committee din a la ni lo bawk a ni.