Supreme Court-ah CAA khinna lut hnem tawh

Citizenship (Amendment) Act, 2019 khinna chu Supreme Court-ah eng emaw zat a lut tawh a, a la luh belh zel rin a ni bawk. 

Petition thehlut zingah All Assam Students Union (AASU), Uttar Pradesh Peace Party, NGO pahnih ‘Rihai Manch’ leh Citizens Against Hate, advocate ML Sharma leh law student-te an tel. Anni bakah Congress MP Jairam Ramesh leh Trinamool Congress MP Mahua Motira te pawhin petition hi an thehlut bawk. All India Majlis-e-Ittehadul Muslimeen (AIMIM) leader Asaduddin Owaisi pawhin Inrinni khan khan petition a thehlut ve leh a,  Indian Union Muslim League (IUML) chuan kar liam ta Ningani khan an lo thehlut tawh  bawk a ni.

Supreme Court-a CAA khingtute hian sakhaw beh­chhana khua leh tui nihna pek theihna dan hi India ram Danpui innghahna kalh, fundamental rights to equality bawhchhiatna a ni tih an sawi. Eptu party-te bakah human rights group  hrang hrang chuan inthliarhranna dan siam hi na takin an sawisel. 

Assam-a BJP thawhpuiina ngaihdan thlak

Assam-a BJP thawhpui, Asom Gana Parishad (AGP) chuan a tirah CAA hi thlawpin, Parliament-ah vote laknaah pawh a thlawp lamah vote thlak mah se, ngaihdan thlak lehin CAA hi Parliament-a khin an tum. 

Inrinni-a party meeting pawimawh an neihah, AGP chuan CAA chungchang hi prime minister Narendra Modi leh home minister Amit Shah sawipui an rel bawk a ni. 

Bengal-ah CAA duh lohna lantir chhunzawm

West Bengal-ah pawh nimin thleng khan CAA duh lohna lantir chhunzawm zel a ni. Ni thum chhung nawrh huaihawt a ni tawh a, hmun hrang hrangah buaina chhuakin motor te hal a ni a, sorkar thilte suasam a ni bawk. Hei vang hian district ṭhenkhatah chuan internet service tihtawp a ni. 

Rorellai Trinamool Cong­ress party hruaitu leh state education minister Partha Chatterjee chuan nawrh huaihawtte chu buaina siam tawh lo tura ngenin, he Act hi an state-ah hman a ni ve dawn lo tih a hrilh.