Bihar CM Nitish Kumar-a'n Rajya Sabha inthlan chuh dawn

Bihar chief minister, Janata Dal (United) hruaitu Nitish Kumar chuan Rajya Sabha inthlan lo awm turah chuh tumin nimin khan nomination paper a theh lut. Inthlan a chuh dawn vang hian Kumar chuan chief mnister anihna aṭanga a ban tur thu a lo puang tawh a ni.

Nimina nomination paper a theh luhnaah, Nitish Kumar hi union home minister Amit Shah chuan a ṭawiawm a ni.

CM aṭanga ban a tum thu a post-naah, Kumar chuan kum rei tak chhung chu Bihar Legislative Assembly bakah Parliament in hnih member nih a lo chak tawh thu a sawi. Kum 20 chuang state mipuite rinna leh thlawpna ṭha tak dawngin an state tan rawng a lo bawl tawh a, hemi avang hian mipuite chungah pawh a lawm hle tih a sawi. Bihar-a sorkar thar chu theihtawpa thawhpui zel tur thu leh, thurawn pawh a pek zel tur thu a tarlang.

Bihar assembly inthlan, nikuma neihah khan JDU leh a thawhpui party-te chaun seat 243 awm aṭangin seat 202 an la thei a ni. Nitish Kumar kaihhruai National Democratic Alliance (NDA) sorkar chu nikum November thla khan lak luh niin kum 75 mi, Kumar hian CM term 10 a chelhna a ni. Mahse, thla li awrh chauh a ral hnuah Rajya Sabha lamah insawn san a tum leh a ni. Bihar-ah hian April thlaah Rajya Sabha seat panga a awl dawn a, Rajya Sabha member hi MLA-te'n an thlan a nih avangin NDA hian state assembly-ah majority a neih vangin Nitish Kumar pawh tling chiang saah ngaih a ni.

Chief Minister a nihna aṭanga Nitish Kumar a ban dawn tak avangin a thlaktu tur an inrinsiak nasa nghal hle a, an sawi langsar zingah deputy chief minister ni lai Samrat Choudhary leh union minister Nityanand Rai te an tel. Hetih lai hian BJP lam hian CM dinhmun hi an chuh maithei nia sawi a awm bawk a, dah a nih chuan Bihar-a BJP-in chief minister a neihna hmasa ber a ni ang.