Amit Shah-a'n 2027 Digital census atana Mascot hman tur tlangzarh

Union home minister Amit Shah chuan nimin khan Census 2027 neih tur atana hman tur digital platform leh mascot hman turte a tlangzarh. An thil tlangzarh hian khawvel huapa chhiarpui lian tham ber neihna tura an inbuatsaih dan a tilang chiang hle niiin Shah chuan a sawi.

Mascot tlangzarh hi Pragati leh Vikas tih hming vuah niin mipa leh hmeichhia enumerator-te entirna atana duan a ni. Ram pum huap hmalakna atana hmeichhia leh mipate inang khat vek an nihna tilang thei tur leh, kum 2047 a ram intodelh nihna tura inpuahchahna tilang theitu tur atana duan a ni.

Chhiarpui neih tur hi thawh hniha kalpui a ni dawn a, rampum huap chhiarpui neih thawh hniha kalpui leh digital toll hman vawi khatna tur a ni bawk. Khua leh tuite chuan portal bik siam aṭangin mahniin inchhung bungraw neih kimchang chu online-in a theh lut thei dawn a, online-a zawhna siamte hi ṭawng chi hrang 16 hmangin siam a ni bawk.

Official-te chuan chhiarpui kalpui a nih turah hian enumerator, supervisor leh thawktu dang nuai 30 chuang ram chhung hmun hrang hranga tirh an nih tur thu an tarlang. April thla aṭanga neih ṭan tura tih a ni a, hetih laiin vur tlak nasatna hmun Union Territoty Ladakh, Jammu and Kashmir, Himachal Pradesh, leh Uttarakhand-ah chuan September aṭangin kalpui a ni thung ang.