CAA siam danglam a ni mai thei: Amit Shah

Citizenship (Amendment) Act, 2019 siam a nih hnua vantlang hmaa thu a sawina hmasa berah, union home minister Amit Shah chuan CAA chu siam danglam a ni mai thei tih a sawi. 

Inrinni-a Jharkhand-a public rally a neihnaah, Amit Shah chuan Assam leh hmarchhak state dangte chu CAA hian an culture, ṭawng, social identity leh political rights te a tihdanglam dawn loh thu a sawi. Hemi rual hian prime minister Narendra Modi  kaihhruai sorkar chuan mipuite humhim chu a mawhphurhna a ni, a ti bawk. 

Amit Shah chuan a ṭul a nih chuan hmarchhak-a political party hruaitute hrang hrangte kawmin Citizenship Act siam danglam a ngaih leh ngaih loh chungchangte a sawipui tur thu a sawi. Union Minister chuan Meghalaya chief minister Conrad Sangma leh a cabinet minister-te nen Zirtawpnia an inkawm thu leh, Meghalaya-a buaina a chhuah dante sawiin he Act hi siam danglam tura an ngen thu a sawi. Meghalaya CM chu Krismas zawh hnua amah hmu tur leh, Meghalaya buaina chinfel dan tur an ngaihtuah tur thu a sawi. 

CAA vanga hmarchhak hmun hrang hranga buaina chhuakah Congress chu mawhphurtuah BJP president Amit Shah chuan a puh bawk. Congress party chuan vote duh vanga engkim tia an ngaih vangin Citizenship  Act pawh hi an dodal a ni, a ti.