Citizenship Amendment Act A nih phung hrim hrim hi inthliarna a ni: UN Human Rights Chief

United Nations High Commissioner for Human Rights chuan Citizenship (Amendment) Act, 2019 nihphung hrim hrim chu inthliarhranna a ni tih sawiin, international law leh Indian constitution palzutah India chu a puh.

Office of the UN High Commissioner for Human Rights (OHCHR) chuan CAB duh lohna lantirnaa mi pahnih an thi tawh tih report an dawn chu an ngai thutak hle tih sawiin, pawl lehlam lehlam chu tharum tawh lo turin a ngen bawk a ni.

UN Human Rights chief, Michele Bachelet thupuangtu  Jeremy Lawrence chuan, "India-in a pawm thar Citizenship (Amendment) Act 2019 chu a nihpung hrim hrimah inthliarhranna a ni," a ti. Supreme Court-in petition lutte an enfiah dawn tih chu a chhinchhiah thu tarlang bawkin, India-in  international human rights-a a thutiamte hrereng chungin hma a lak a beisei thu a sawi.

Afghanistan, Bangladesh leh Pakistan-a sakhaw tlem parukte hnena khua leh tui nihna pek an nih theih dawn laia, Muslim-te humhimna pek an ni ve lo chu an ngai thutak hle tih a sawi bawk.

Jeremy Lawrence chuan dan siam ṭhat chu India constitution, International Covenant on Civil and Political Rights leh Convention for the Elimination of Racial Discrimination-a India intiamna kalh nia a lan thu leh intluktlanna kalh nia a lan thu a sawi. India chu state party, vun rawng, chi leh sakhuanaa inthliarhranna kalpui lo tu zinga tel a nih thu a sawi bawk a ni.

Citizenship (Amendment) Bill hi Thawhṭanni hmasa khan Lok Sabha-ah pawm a ni a, Thawhlehni khan Rajya Sabha-ah pawm leh nghal niin, Ningani zanah khan President-in a pawmpuina a ziak leh nghal; Zirtawpni kha chuan Act-ah a chang tawh a ni.