West Asia-a indo vangin basmati rice metric ton 60,000 tangkhang

US leh Israel-in Iran an beih hnua West Asia-a indona thleng vangin India-in ram pawna a thawn chhuah tur, basmati rice metric ton 60000 chu ram chhunga lawng chawlh hmun hrang hrangah an tangkhang mek. Buhfai thawn chhuaktute chuan an harsastna tawh mek chinfel dan ngaihtuah pui thuai turin sorkar an ngen.

India-in ram danga buhfai a thawn chhuah zingah a zahve vel hi Africa leh West Asia-ah a thawn a ni. West Asia-a kum khata buhfai a thawn chhuah zinga 90% vel hi basmati rice a ni a, hei hi Rs vbc 25,000 man hu vel a tling.

Indian Rice Exporters Federation (IREF) chuan Agricultural and Processed Food Products Export Development Authority (APEDA) chairman, Abhishek Dev hnenah lehkha an thawn a, sorkar chuan an harsatna tawh mek chungchangah thurawn emaw, hriattirna emaw a tihchhuah an beisei thu a sawi. Sorkar lamin aw a chhuah loh chuan buhfai leitu ram lam aṭangin nawrna a nasa dawn a, a hun taka an thawn chhuah theih loh avangin a man tihniam tura an nawr bakah, pawisa an chawitir hial pawh a hlauhthawnawm niin an tarlang. An harsatna tawh chu an pawl thuneihna piah lam a ni a, hei vang hian a leitu ram, bank leh, insurer leh an thawhpui dangte nen pawha inbiakna neih ṭha an tih thu an sawi bawk.

IREF chuan lawng chawlh hmuna buhfai tam tak tangkhang mek avang hian fee an chawi turte ngaihhnathiam tur te, buhfai chhek tawhte chu thawn kir dan ngaihtuah emaw, hmun danga kal tir dan emaw ngaihtuah tura an phut thu an sawi bawk a ni.