NCERT-in judiciary chapter ziah danah ngaihdam dil

National Council of Educational Research and Training (NCERT) chuan Grade 8 (Part-II) social science textbook, 'Exploring Society: India and Beyond'-a Judiciary chapter-ah thu inziah dan chungchangah nimin khan ngaihdam a dil a, zirlaibu hi lak kir leh vek a nih tih a tarlang.

'Exploring Society: India and Beyond' textbook-a Chapter IV 'The Role of Judiciary in our Society' ah judiciary-a eirukna chungchang, 'corruption in the judiciary' section dah tel a ni. Hei hian sawi zui a hlawh hle a, Supreme Court pawhin na takin a sawisel a ni. Chief justice of India Surya Kant chuan judiciary zahawmna tihbawrhbanna chu a pawm dawn lo tih sawiin, hei hi zirlaibua telh a duh loh thu leh, dan ang taka hma an lak tur thute pawh a sawi a ni.

Hemi hnu hian NCERT chuan Social Science textbook thawn chhuah hi a titawp nghal a, an sawi chapter-ah hian thil tihsual a awm niin an tarlang. Supreme Court chuan hma la nghalin, zirlaibu thawn chhuah hi a khap bakah, thawn chhuah tawhte pawh la kir leh vek turin a ti a, a digital version pawh paih bo nghal turin a ti bawk. Uluk zawka chhui chian a ngaih thu court chuan a sawi a, hetianga thiltih hian mipuiten dan lam rorelna an rinna a tichhe thei a ni tiin a sawi.

Sorkar laipui aiawh, Solicitor General Tushar Mehta chuan Ministry of Education hmingin ngaihdam a dil a, judiciary-a eirukna chungchang tarlana mawphurhtu mi pahnihte chu UGC leh ministry dang hnuaiah an thawk ngai tawh lo ang, a ti.