Maoist mi leh sa 108 silai tungin sorkarah in pe leh

Sorkar laipuiin March 31 hmaa Moaist hel tukdawlna tura a hmalakna, 'Anti-Maoist' campaign chuan a hmawr bawk lam hnaih zelin, nimin khan sorkar kutah Maoist mi leh sa 108 chu silai tungin an in pe leh. Maoist mi leh sa in pe zawng zawng aṭanga luman nei hrang hrang belhkhawm hi Rs vbc 3.95 a tling a ni.

Maoist in pete aṭanga thu dawn bawhzuiin security force-te beihpui an thlaknaah chuan pawisa Rs vbc 3.61 leh rangkachak kg 1 Rs. vbc 1.64 hu an man tel a, hei bakah hian ralthuam dahṭhat eng emaw zat man a ni bawk. Official-te chuan an thil man zawng zawng hi anti-Maoist beihpui thlakna kalpui tawha rangkachak an la man hnem ber ṭum a nih thu an tarlang.

Union home minister Amit Shah chuan kumin March 31 hma ngeia Maoist tukdawlna tur a puan hnuah beihpui hi thlak zui reng niin, Maoist mi leh sa bakah an hruaitu lawk zual eng emaw zat chu vantlang nunphung pangngaia nung tur hian an lo inpe tawh a ni. Maoist inpete hnenah hian sorkar chuan chhawmdawlnain a pe a, vantlang nunphung pangngaia nung duhte tan zirtirna an mamawh ang pawh pek vek a tiam bawk a ni.