MP 200 chuangin CEC ban phutna notice-ah hming ziak

Lok Sabha MP 130 leh Rajya Sabha 63-te chuan chief election commissioner Gyanesh Kumar ban a nih theihna tura motion put luh phutin notice an siamah hming an ziak. He notice hi vawiinah House ah theh luh an tum.

Kaihhruaina danah chuan Lok Sabha-ah CEC ban phutna motion pu lut tur hian notice-ah MP 100 talin an hming an ziah a ngai a, Rajya Sabha tan MP 50 in an hming an ziah a ngai bawk. Notice-ah hian INDIA bloc-a party hrang hrang member-te chuan an hming an ziak vek a ni. Bloc-ah official-in tel tawh lo mah se, Aam Aadmi Party (AAP) MP-te pawhin an hming an ziak ve bawk.

Tun ṭum hi CEC ban phuta notice siam a nihna hmasa ber a ni. Notice-ah hian CEC an puhna pasarih tarlangin, office-a a ro rel danah awn lam nei leh inthliarhranna kalpui, inthlan kaihhnawiha thil dik tawk lo thleng chhuina tur lo dang leh, mi tam tak vote nei tura dikna tihchhiatsaka puhna te a tel. Hei hi state hrang hranga electoral roll ennawnna, Special Intensive Revision (SIR) kalpuinaa voter tam tak paih an nih chungchang a ni. Eptute chuan SIR kalpui mek chu central-a rorellai party puihna tura ruahman niin an puh a ni. West Bengal chief minister Mamata Banerjee chuan SIR hmang hian an state-a voter dik tak ṭhahem tak paihah poll panel hi a lo puh tawh a ni.

CEC ban phutna motion hi Parliament in hnihah a eng emaw zawk zawkah put luh theih a ni a, motion tlang tur hian an put luhna House-a member awm zat aṭanga hmun thuma ṭhena hmun hnihin an pawm a ngai.