Ram chhung hmun hrang hrangah CAA duh lohna lantir

Citizenship (Amend­ment) Act, 2019 do­dal­na leh duh lohna chu ramchhung hmun hrang hrangah lantir chhunzawm zel a ni. 

Delhi-a Jamia Millia Islamia University leh Uttar Pradesh-a Aligarh Muslim University (AMU) zirlaiten CAA dodalna an lantirnaah police-te nen innawr buaiin buaina nasa tak a chhuak a, zirlai tam takin kut an tuar. Hei vang hian nimin khan ramchhung  hmun hrang hranga zirna in tam takah CAA duh lohna leh, zirlaite chunga police-te chet dan duh lohna hi  lantir chhunzawm a ni. 

West Bengal CM hoin kawng zawh 

West Bengal chief minister Mamata Banerjee hoin nimin khan Kolkata-ah Citizenship (Amend­ment) Act leh ram puma National Re­gister of Citizens (NRC) kalpui tum duh lohna lantirin kawng zawh a ni. Trinamool Congress hotu Mama­ta Banerjee hian Red Road aṭangin kawngzawh hma a hruai a, km 4-a hla, north Kolkata-a Nobel laureate Rabindranath Tagore in, Joraskho Thakur Bari thlengin an zawh a ni. Party hruaitu leh worker an tel ṭha hle a, Citizenship law siamthar duh lohna thuziakte an keng. TMC hian Pathianni khan state chhung hmun hrang hrangah Muslim-te enhranna dan siam hi duh loin rally an lo huaihawt tawh bawk. 

Banerjee chuan an Bengal-ah NRC leh CAA hi hman an remti ve ngai dawn lo tih sawiin, Nilainiah citizenship law dodalna kawngzawh buatsaih leh a nih tur thu a sawi. Hetihlai hian West Bengal Go­vernor Jagdeep Dhankhar chuan Banerjee chu sawiselin, "Chief minister leh a minister-ten India ram dan, CAA duh lohna kawngzawhna an buatsaih hian min ti na hle a ni. Hetianga ram danpui kalh zawng leh buaina chawk chhuak thei thilah hian CM chu inhnamhnawih lo turin ka ngen a ni," a ti.