Kerala-a rorellai leh eptu party-ten CAA duhlohna lantir

Kerala-a rorellai, Left Democratic Front leh eptu pawl, Congress kaihhruai United Democratic Front chuan nimin khan lungrual takin Citizenship (Amendment) Act duh lohna an lantir. 

LDF leh UDF hruaitute chuan CAA chu prime minister Narendra Modi-a kaihhruai sorkar laipuiin ram danpui kalha sakhaw behchhana hmanga India ram ṭhendarh a tumna a ni, an ti. Chief minister Pinarayi Vijayan chuan PM Modi-a sorkarin India rama sakhaw tin zalenna neih palzut a tumna chu Kerala mipuite chuan lungrual takin an do let zel dawn tih a sawi. India ram hmun hrang hrangah CAA duh lohna lantira nawrh huaihawt mekte an thlawp thu CM chuan a sawi bawk. Palayam-a Matyrs' column-a nawrh an huaihawtnaah hian zirlai tam takin an zawm bawk a ni.