Vawiinah Srinagar-ah Tulip Festival hawng dawn

Jammu and Kashmir chief minister Omar Abdullah chuan kumtina an hman ṭhin, Tulip Festival chu vawiin hian a hawng dawn. Asia khawmualpuia tulip garden lian ber, Srinagar-a Indira Gandhi Memorial Tulip Garden chu mipui tlawh theiha hawn a ni dawn a ni. Acre 30 dawna zaua tulip an chinna hmun hi kumtin tulip par hun laiin mipui tlawh theiha hawn ṭhin a ni.

J&K-a Floriculture director, Mathoora Masoom chuan kuminah tulip hi chi hrang 70-75 vel an nei tih sawiin, a tlawhtute tan thlalak mawi theihna lai turah selfie point-te pawh an siam belh tih a tarlang. Tulip hi kung mtd 1.5 dawn an tling a, rawng chi hrang hrang niin an par vul chhung hi ni 15-20 vel a ni tlangpui.

Tulip garden hi kumtin mi nuai telin an tlawh ṭhin a, Kashmir tihmingthangtu leh khualzin hiptu ṭha tak a tling a ni. Kum 2024-ah khan tlawhtu, state pawn leh tualchhung mi nuai li chuang an awm a, kum 2023-ah nuai 3.5 in an tlawh bawk. Nikumah khan Pahalgam-a firfiakte pawikhawihna thlengin a nghawng avangin tlawhtu hi an tlahniam thung.

Indira Gandhi Memorial Tulip Garden hi a hma chuan Model Floriculture Centre tih a ni ṭhin a, Zabarwan Range-ah awmin J&K sorkarin Kashmir Valley-a floriculture leh tourism chawilarna tura a hmalakna niin, kum 2007 khan hawn a ni. Srinagar airport leh city centre aṭanga km 12-18 vel chauha hlaa awm a ni a, zing dar 9 aṭanga zan dar 7 thleng hawn a ni ang. Tulip bakah pangpar dang - hyacinth, daffodil leh ranunculus te chin tel a ni bawk.