CAA in tumah a tibuai dawn lo : PM Modi

Prime minister Narendra Modi chuan CAA dodalna lantira tharum thawhna thleng chu pawi a tih thu a sawi a, India mi tan he Act hi hlauh tur a awm lo tih a sawi. PM chuan CAA chu India ram pawna sakhaw thil vanga tihduhdah tawk, India ram ni lo hmundanga tlanchhiatna tur nei lote tan chauh a ni, a ti. He dan hian India mi tumah, eng sakhua mah a nghawng buai dawn lo tiin a sawi. 

Narendra Modi chuan democracy ramah chuan thil sawihoa inhnial a, an duh lo zawng pawh ṭawngkama sawi mai ṭhin a ni a, sokar thil tihchhiat leh mipui nunphung tibuai zawnga thiltih chu an tihdan phung a ni ngai lo, tiin a sawi. CAA chu Parliament in hnihah hneh taka pass a ni a, political party leh MP tam takin an thlawp a, he dan siam thar hian India ramin hun rei tak a lo kalpui tawh thin- inpawmtawnna, inlungrualna, inkhawngaihtawnna leh inunauna chu a tilang chiang hle a ni, a ti. 

Prime minister Narendra Modi chuan Jharkhand-a Dumka hmuna State Assembly inthlan neih tura BJP tana campaign a neihnaah, "CAA vanga buaina siamtute chu an kawrhak aṭangin an hriat hran theih" tiin a sawi.

PM Modi hian BJP tan campaign a neihnaah Citizenship (Amendment) Act 2019 (CAA) chungchang sawi chhuakin, parliament-in he dan hi a pass avanga a lawm thu leh, parliament thutlukna hi 1,000%-a a dik thu a sawi bawk. 

Assam, West Bengal leh ramchung hmun hrang hranga CAA avanga buaina chu, Citizenship Amendment Bill (CAB) parliament-a Congress-in bill thlawp chungchanga BJP an hneh loh vanga buai a nih thu Modi chuan sawiin, ramchhunga buaina awm mek chu Congress leh a thawhpui thiltihah a puh bawk a ni.

Modi hian London-a Indian High Commission kawta Congress-in nawrh an huaihawt chu a dem thu sawi langin, Pakistan chunga Congress chet dan a deusawh thu a sawi bawk.