Indore-ah EV charge-na puak vangin mi 8 thi

Madhya Pradesh-a Indore-ah nimin zing khan Electric Vehicle (EC) charging point puakin a bulhnaia in chhawng thum a tih kan zui avangin in kanga cheng chhungkaw khat mi pariat chu an thi vek tih official chuan an tarlang. Thi zingah hian naupang pahnih leh hmeiche puitling pathum an tel. Madhya Pradesh sorkar chuan thil thlen dan kimchang chhui chian a nih tur thu an puang.

EV charge-naa motor charge lai mek chu puakin a kang zui nghal a, a bul hnaia awm in chhawng thum chu kangkai nghalin thihna hial a thlen zui phah ta tih police commissioner Santosh Kumar Singh chuan a tarlang. In kang aṭang hian mi pathum chhanchhuah hman an ni a, mi pariatte ruang hi post-mortem tura lak a ni thung.

Kangmei chhuahna in kawngkhar chu electronic lock hman a nih avangin chhanchhuah hna thawh chu a tibuaithlak niin an police lam chuan an tarlang. State Urban Development and Housing minister Kailash Vijayvargiya chuan chhiatna thlenna hmun tlawh nghalin chhuichianna kalpui a nih tur thu leh, EC charge-na hmun te aṭha tawk em tih tehna tur Standard Operating Procedure (SOP) siam a nih thuai tur thu a sawi.